Eid-E-Ghadir - Part 1

Mukhtasar Eid-E-Ghadir
Qist Number - (1)

Mohtaram Qareen-E-Kiraam,

Ye Tehreer Neem Rafziyon Ke Liye Hain Jo Kehte To Khud Ko Sunni Hain Lekin Kaam Rafziyon Wale Karte Hain Aur Is Tehreer Ka Talluq Hamare Un Sunni Bhaiyon Se Hain Jo Ahle Bait Ki Mohabbat Mein In Kaamon Ko Ikhtiyar Kar Lete Hain Jo Rawafiz Ka Shi'aar Hain.

Ghadir-E-Khum Ke Waqiye Ka Pas-E-Manzar

Ghadir-E-Khum Ke Waqiye Ka Pas-E-Manzar Jo Riwayat Mein Aata Hain Wo Kuch Yun Hain Ke Nabi-E-Kareem Sallallahu Alaihi Wa Sallam Ne Hajj Se Qabl Hazrat Ali Razi Allahu Anhu Ko Yaman Ki Taraf Khumus Waghaira Jama Karne Sahaba-E-Kiraam Razi Allahu Anhum Ki Ek Jama'at Par Ameer Bana Kar Bheja Tha. Wapsi Mein Hazrat Ali Razi Allahu Anhu Ne Khumus Ke Maal Mein Se Ek Behtareen Londi Apne Liye Rakh Li, Digar Sahaba-E-Kiraam Razi Allahu Anhum Ne Is Par Aetraz Kiya, Jab Ye Log Makkah Pohanche To Un Mein Se Hazrat Buraydah Razi Allahu Anhu Ne Nabi-E-Kareem Sallallahu Alaihi Wa Sallam Ko Hazrat Ali Razi Allahu Anhu Ki Shikayat Ki, Nabi-E-Kareem Sallallahu Alaihi Wa Sallam Ne Un Se Poocha Ke Kya Tum Ali Razi Allahu Anhu Se (Is Mamla Ki Wajah Se) Ranjish Rakhte Ho? To Unhone Arz Ki: Haan, To Aap Sallallahu Alaihi Wa Sallam Ne Farmaya Ke Aisa Na Karo Ke Ali Razi Allahu Anhu Ke Liye Khumus Mein Is Se Bhi Zyada Hissa Hain Jo Unhone Rakh Liya Hain.

(Sahih Bukhari: 4350, Musnad Ahmad: 22967, 23036, Mirqat Sharh Mishkat: 11/247, Baihaqi Fil Kabir: 6/342, Al-Sawa’iqul Muharriqa: 1/109, Al-Aetqad Lil Baihaqi S. 498, Al-Bidayah Wan Nihayah 5/227)

Ibn-E-Kaseer Apni Tasneef Al-Siratul Nabawiyyah Mein Is Ke Bare Mein Yun Raqmatraz Hain: Zilhijjah Ka Mahina Tha, Is Maah Ki Atharah Tareekh Thi, Itwaar Ka Din Tha, Nabi-E-Kareem Sallallahu Alaihi Wa Sallam Ne Is Mauqa Par Ek Azeem-Ush-Shan Khutbah Irshad Farmaya Jis Mein Sayyidna Ali-Ul-Murtaza Razi Allahu Anhu Ke Fazl-O-Kamaal, Amanat-O-Dayanat, Adl-O-Insaf Ke Bare Mein Apni Zaban-E-Haqeeqat Bayan Se Shahadat Di. Is Shahadat Ke Baad Agar Kisi Galat Fehmi Ke Baais Kisi Ke Dil Mein Sayyidna Ali-Ul-Murtaza Razi Allahu Anhu Ke Bare Mein Koi Waswasa Tha To Wo Hamesha Ke Liye Mahu Ho Gaya.

Hazrat Buraydah Bin Haseeb Kehte Hain Mein Bhi Un Logon Mein Se Tha Jin Ke Dilon Mein Sayyidna Ali-Ul-Murtaza Razi Allahu Anhu Ki Zaat-E-Wala Sifaat Ke Bare Mein Tarah Tarah Ki Galat Fehmiyan Paida Ho Gayi Thi. Sarkar-E-Do Aalam Sallallahu Alaihi Wa Sallam Ke Is Irshad-E-Paak Ko Sun Kar Mere Dil Mein Sayyidna Ali-Ul-Murtaza Razi Allahu Anhu Ki Itni Mohabbat Paida Ho Gayi Ke Aap Mere Sab Se Zyada Mehboob Ban Gaye.

Nabi-E-Kareem Sallallahu Alaihi Wa Sallam Ke Is Farman Se Hazrat Buraydah To Raazi Ho Gaye Albatta Logon Ke Darmiyan Ye Baat Phail Gayi Aur Hazrat Ali Razi Allahu Anhu Ke Mut'alliq Tarah Tarah Ki Chemi Goiyaan Hone Lagi, Lehaza Nabi-E-Kareem Sallallahu Alaihi Wa Sallam Ne Hazrat Ali Razi Allahu Anhu Ki Zaat Ke Mut'alliq Aam-Un-Naas Ke Zehnon Mein Paida Hone Wale Shubhat Ko Khatam Karne Ke Liye Khitab Karna Munasib Samjha Aur Is Ke Liye Ghadir-E-Khum Ke Maqam Ko Chuna Gaya.

Ghadir-E-Khum Makkah Aur Madina Ke Darmiyan Waqe Hain. Chunke Ye Maqam Ahd-E-Nabvi Mein Ek Churahe Ki Haisiyat Rakhta Tha, Yahan Se Jazeerat-Ul-Arab Ke Atraaf-O-Iknaf Ke Liye Raste Nikalte The, Lehaza Nabi-E-Kareem Sallallahu Alaihi Wa Sallam Ne Is Maqam Ko Nihayat Munasib Samjha. Chunanche Hajj Se Wapsi Par Jab Hujjaj-E-Kiraam Ka Qafila Ghadir-E-Khum Ke Maqam Par Pohncha To Nabi-E-Kareem Sallallahu Alaihi Wa Sallam Ne Yahan Mukhtasar Qayam Farmaya Aur Baad Namaz-E-Johar Khutbah Irshad Farmaya Ke Jis Mein Rasulullah Sallallahu Alaihi Wa Sallam Ne Farmaya:

مَنْ كُنْتُ مَوْلَاهُ ، فَعَلِيٌّ مَوْلَاهُ

"Jis Ka Mein Mawla Hun, Ali Bhi Us Ke Mawla Hain."

(Musnad Ahmad: 18479)

:- Jaari Hain ____
Agli Post Bhi Zaroor Padhein Taake Masla Aapko Samajh Aaye.

---

👉 Click For Part 2

Join Us On Instagram