Barkati Kashana

 

Aala Hazrat Imam Ahmed Raza Khan Barelvi (Radiyallahu Ta'ala Anhu)

Aala Hazrat Imam Ahmed Raza Khan Barelvi (Radiyallahu Ta'ala Anhu) 14wi Sadi Hijri Ke Mujaddid, Azeem Faqih, Muhaddis, Muffasir, Mufti Aur Be-Misaal Aashiq-E-Rasool The. Aap Ne Apni Puri Zindagi Islam Ki Khidmat, Sunnat Ki Ishaat, Ishq-E-Mustafa ﷺ Ke Farogh Aur Ahle Sunnat Ke Aqeede Ki Hifazat Mein Guzar Di.

Paidaish Aur Taleem

Aap Ki Wiladat 10 Shawwal 1272 Hijri Mutabiq 14 June 1856 Iswi, Sanicher (Saturday/Shamba) Ke Din Zohar Ke Waqt Mohalla Jasoli, Shehar Bareilly Mein Hui. Aap Ka Paidaishi Naam Muhammad, Tarikhi Naam Al-Mukhtar, Aur Aap Ke Dada Hazrat Maulana Raza Ali Khan (Radiyallahu Anhu) Ne Aap Ka Naam Ahmed Raza Rakha. (Sawaneh Aala Hazrat, Safha 88)

Aap Ke Walid Hazrat Maulana Naqi Ali Khan (Radiyallahu Anhu) Apne Zamane Ke Bade Aalim The Aur Dada Hazrat Maulana Raza Ali Khan Bhi Bade Aalim Aur Ba-Karamat Wali The. Aala Hazrat Ne 21 Uloom Apne Walid Se Hasil Kiye.

Aap Ne Sirf 4 Saal Ki Umar Mein Quran Majeed Nazra Mukammal Kiya. 6 Saal Ki Umar Mein Mimbar Par Jalwa Afroz Hokar Bade Majme Ke Samne Milad Shareef Padha. Isi Umar Mein Baghdad Shareef Ki Simt Maloom Ki Aur Phir Apni Aakhri Saans Tak Baghdad Shareef Ki Taraf Paanv Na Failaya.

Kisi Ne Aap Ko "Hafiz" Likha To Aap Ne Farmaya:

"Main Kis Kis Ko Hafiz Kehne Se Mana Karun."

Is Ke Baad Aap Ne Sirf Ek Mahine Mein Poora Quran Hifz Kar Liya. Din Mein Yaad Karte Aur Raat Mein Taraweeh Mein Sunate.

8 Saal Ki Umar Mein Arabi Zaban Mein Ek Kitab Likh Kar Ulama Ko Hairan Kar Diya.

Urdu Aur Farsi Ki Taleem Ke Baad Aap Ne Apne Walid Se Arabi Zaban Mein Deen Ki Aala Taleem Hasil Ki.

13 Saal 10 Mah 5 Din Ki Umar Mein (14 Sha'ban 1286 Hijri Mutabiq 19 November 1869 Iswi) Aap Ko Aalim-E-Deen Ki Sanad Di Gayi Aur Usi Din Walid-E-Majid Ne Aap Ke Ilmi Kamal Aur Pukhtagi Ko Dekh Kar Fatwa Naveesi Ki Zimmedari Aap Ke Supurd Kar Di. Aap Ne Apna Pehla Fatwa Bhi Isi Umar Mein Likha Aur 1340 Hijri (1921 Iswi) Tak Yeh Silsila Jaari Rakha.

Gharana

Aala Hazrat Ke 2 Bhai, 2 Behnein, 2 Bete, 5 Betiyan, 3 Pote, 10 Potiyan Aur 3 Phuphiyan Thin.

Aap Ka Silsila-E-Aulad Hazrat Hamid Raza Khan Se Chala, Jabke Dusre Bete Duniya Bhar Mein Mufti-E-Azam Hind Ke Naam Se Mashhoor Hue.

Aala Hazrat Ne Apne Tamam Beton Aur Bhatijon Ka Ek Hi Naam Muhammad Rakha Tha, Jabke Pehchan Ke Liye Alag Alag Urf Rakhe. (Tazkira Aala Hazrat)

Aap Ke Bade Sahibzade Hazrat Hamid Raza Khan Ka Inteqal Halat-E-Namaz Mein Hua. Un Ke Bare Mein Aala Hazrat Ne Farmaya:

"Hamid Mujh Se Hai Aur Main Hamid Se Hun."

Bay'at Aur Hajj

5 Jumada Al-Akhirah 1294 Hijri Mutabiq 17 June 1877 Iswi Ko Aap Hazrat Maulana Sayyid Aal-E-Rasool Ahmadi Marehrawi (Radiyallahu Anhu) Ke Dast-E-Haq Parast Par Mureed Hue Aur Batini Taleem Hasil Ki.

Zul Hijjah 1295 Hijri Mutabiq December 1877 Mein Pehli Baar Hajj Ada Farmaya.

Rabi-Ul-Awwal 1324 Hijri Mutabiq April 1906 Iswi Mein Dobara Haramain Shareefain Ki Hazri Hui. Aap Ne Ek Mahina Madinah Tayyibah Mein Guzar Kar Bargah-E-Risalat ﷺ Ki Ziyarat Ki.

Makkah Mukarramah Aur Madinah Munawwarah Ke Buzurg Ulama Ne Aap Ke Ilmi Kamalat Ko Dekh Kar Aap Ke Dast-E-Mubarak Par Bay'at Ki Aur Aap Ko Apna Ustad Aur Peshwa Tasleem Kiya.

Sayyidon Se Muhabbat

Aala Hazrat Sayyidon Ka Be-Panah Ehteram Farmate The.

Jab Aap Ke Yahan Mahfil-E-Milad Hoti To Sayyidon Ko Dugna Nazrana Ata Farmate.

Aap Ne Bhi Sayyid Gharane Se Hi Bay'at Ki Aur Hazrat Sayyid Aal-E-Rasool Ahmadi Marehrawi Ko Apna Peer Banaya.

Hazrat Murshid Ne Farmaya:

"Qayamat Ke Din Allah Ta'ala Poochega: Ae Aal-E-Rasool! Duniya Se Kya Laye Ho? Main Arz Karunga: Ya Allah! Main Ahmad Raza Ko Laya Hun."

Mizaj Aur Akhlaq

Aala Hazrat Ki Takreer Aur Tahreer Mein Jo Sakhti Nazar Aati Hai Woh Sirf Huzoor Nabi Kareem ﷺ Ke Gustakhon Ke Liye Thi.

Huzoor ﷺ Ke Wafadaron Ke Liye Aap Abr-E-Karam The.

Aap Ka Zahir Aur Batin Ek Jaisa Tha. Jo Dil Mein Hota Wahi Zaban Par Hota.

Aap Ki Dosti Aur Dushmani Sirf Allah Aur Rasool ﷺ Ke Liye Hoti Thi.

Riwayat Hai Ke Hyderabad Se Ek Rafzi Aap Se Milne Aaya. Chunki Woh Sahaba-E-Kiram Ki Gustakhi Karta Tha Is Liye Aap Ne Us Ki Taraf Dekhna Bhi Pasand Na Farmaya.

Ishq-E-Rasool ﷺ

Aala Hazrat Ki Sari Zindagi Ishq-E-Mustafa ﷺ Se Roshan Thi.

Aap Kabhi Hadees Shareef Ki Kitab Ke Upar Koi Doosri Kitab Na Rakhte.

Namaz Hamesha Masjid Mein Aur Amamah Shareef Ke Saath Ada Farmate.

Jab Koi Haji Aap Ki Khidmat Mein Hazir Hota To Pehla Sawal Farmate:

"Kya Madinah Shareef Ki Hazri Di?"

Agar Jawab Haan Hota To Us Ke Qadam Choom Lete, Aur Agar Na Hota To Us Ki Taraf Tawajjuh Na Farmate.

Aap Farmate The:

"Huzoor ﷺ Ki Adna Si Gustakhi Karne Wala Tumhara Kaisa Hi Aziz Kyun Na Ho, Use Dil Se Aise Nikal Phenko Jaise Doodh Se Makkhi."

Aur Farmaya:

"Jinke Talwon Ka Dhowan Hai Aab-E-Hayat, Hai Woh Jaan-E-Masiha Hamara Nabi."

Aur:

"Agar Koi Mere Dil Ke Do Tukde Kare To Ek Par 'La Ilaha Illallah' Aur Doosre Par 'Muhammadur Rasoolullah' Likha Hua Payega."

Farman-E-Aala Hazrat

Sachche Iman Ke Liye Do Baatein Zaroori Hain:

1. Nabi-E-Kareem ﷺ Ki Muhabbat.
2. Nabi-E-Kareem ﷺ Ki Ta'zeem.

Huzoor ﷺ Ki Ta'zeem, Ahl-E-Bait Se Muhabbat Aur Huzoor ﷺ Se Muta'alliq Har Cheez Se Muhabbat Hi Aala Hazrat Ka Maqsad-E-Zindagi Tha.

Hadees "Jo Meri Aulad Ka Haqq Na Pehchane Woh Teen Baton Mein Se Ek Se Khaali Nahin: Ya To Munafiq Hai, Ya Haraami (Zina Se Paida), Ya Haizi Bachcha Hai."

(Fatawa Razawiyyah, Jild 10, Safha 131)

Kanz-Ul-Iman

Aala Hazrat Ne 1911 Iswi Mein Quran Majeed Ka Urdu Tarjuma "Kanz-Ul-Iman" Ke Naam Se Kiya.

Ye Tarjuma Hazrat Maulana Amjad Ali Azmi Ki Guzarish Par Likha Gaya.

Muhaddis-E-Azam Hind Farmate Hain:

"Aala Hazrat Ka Tarjuma-E-Quran Ilhami Hai."

Aap Ne Tarjume Mein Allah Ta'ala Aur Rasoolullah ﷺ Ki Shan-O-Azmat Ka Be-Misaal Lihaz Farmaya.

Deeni Khidmaat

Aap Ne Hosh Sambhalne Ke Baad Apni Sari Zindagi Islam Ki Khidmat Aur Sunnat Ki Ishaat Mein Guzar Di.

Aap Ne 55 Se Zyada Uloom Par Taqreeban 1000 Se 1300 Kitabein Tasneef Farmain.

Aap Ki Azeem Tasaneef Mein Fatawa Razawiyyah Sab Se Mashhoor Hai Jo Fiqh-E-Hanafi Ka Azeem Khazana Hai.

Aap Ka Likha Hua Mashhoor Salam:

"Mustafa Jaan-E-Rehmat Pe Lakhon Salam"

Aaj Bhi Azaan Ke Baad Duniya Mein Sab Se Zyada Padha Jane Wala Salam Mana Jata Hai.

Aap Ke Natiya Kalam Ki Shohrat Duniya Bhar Mein Hai.

Aap Ne Lagbhag 54 Saal Tak Deen Ki Azeem Khidmat Anjam Di. (Tazkira-E-Raza)

Gumrah Firqon Ka Radd

Aap Ke Zamane Mein Nechri, Makkar Sufi, Ghair Muqallid Wahabi, Deobandi Wahabi Aur Qadiyani Fitne Phail Rahe The.

Aap Ne Quran-O-Sunnat Ki Roshni Mein In Tamam Gumrah Girohon Ka Ilm Ke Saath Radd Farmaya Aur Haq Aur Batil Ko Wazeh Kar Diya.

Aap Ke Fatawa Aur Kitabon Ke Zariye Allah Ta'ala Ne Hazaron Bhatke Hue Musalmanon Ko Hidayat Ata Farmayi.

Bohat Se Ulama Jo Gumrahi Ki Taraf Ja Rahe The Aap Ki Rehnumai Se Haq Qabool Kar Ke Seedhi Rah Par Aa Gaye.

Jab Wahabiyon Aur Deobandiyon Ne Sarkar-E-Mustafa ﷺ Ki Shan Mein Gustakhiyan Likhin To Aala Hazrat Ne Pahad Ki Tarah Jam Kar Ishq-E-Rasool ﷺ Ka Parcham Buland Kiya Aur Musalmanon Ko Muhabbat-E-Rasool ﷺ Ki Taleem Di.

Sunni Ulama Wa Mashaikh Aur Aam Musalman Aap Ko Apna Azeem Deeni Peshwa Mante Hain Aur Aaj Bhi Aap Ke Fatawa Par Amal Karte Hain.

Angrezon Se Nafrat

Rampur Ki Angrezi Court Mein Aala Hazrat Par Case Kiya Gaya.

Aap Ne Farmaya:

"Ahmed Raza To Door, Ahmed Raza Ki Jooti Bhi Angrezi Court Mein Nahin Jayegi."

Mukhalifeen Aap Par Ilzamat Lagate Rahe, Lekin Aala Hazrat Angrezi Hukumat Ke Sakht Mukhalif The.

Wisaal

Aap Ne Puri Zindagi Deen Ki Khidmat Aur Ishq-E-Mustafa ﷺ Ki Daulat Taqseem Karte Hue Guzari.

Duniya Ke Bade Bade Ulama Aur Fuqaha Ne Aap Ko Mujaddid Tasleem Kiya.

Aaj Bhi Duniya Ki Kai Universities Mein Aap Ki Ilm-O-Fikr Par Research Ho Rahi Hai.

Aap Ka Wisaal 25 Safar 1340 Hijri Mutabiq 28 October 1921 Iswi, Juma Ke Din Taqreeban 2:30 Baje, Azaan-E-Juma Ke Dauran Hua.

Aap Ka Mazar Shareef Bareilly Ke Mohalla Saudagaran Mein Hai.

Aqwaal

Ashraf Ali Thanvi Se Mansoob Hai:

"Mere Dil Mein Ahmed Raza Ke Liye Be Had Ehteram Hai. Woh Hamein Kafir Kehta Hai, Lekin Ishq-E-Rasool Ke Bina Par Ke Kehta Hai, Kisi Aur Gharz Se Nahin Kehta."

Sayyadi Aala Hazrat Pe Lakhon Salam.
Sayyadi Sarkar Aala Hazrat Zindabad.