Ahl-E-Bait

 Sarkar-E-Mustafa ﷺ Ki Muqaddas Biwiyon Aur Auladon Ko Ahl-E-Bait Kehte Hain, Ahl Ka Ma'na "Wale" Aur Bait Ka Ma'na "Ghar" Lihaza Ahl-E-Bait Ke Ma'ne Hue Ghar Wale.

Sarkar ﷺ Ki Azwaj-E-Tahirah Gyarah Hain Jin Mein Hazrat Khadijah Raziyallahu Anha Aur Hazrat Aisha Raziyallahu Ta'ala Anha Ka Naam Bahut Mashhoor Hai. Allah Ta'ala Ne Sarkar ﷺ Ki Azwaj Ka Naam Izzat Ke Taur Par Ummul Momineen Rakha Hai. Umm Ka Ma'na Maa, Aur Ummul Momineen Ka Ma'na Musalmanon Ki Maa.

Pyare Mustafa ﷺ Ke Yahan Teen Shahzade Aur Char Shahzadiyan Paida Huin. Shahzadon Ke Naam Yeh Hain: Hazrat Qasim, Hazrat Abdullah, Hazrat Ibrahim Raziyallahu Ta'ala Anhum. Yeh Teeno Hazrat Apni Nanhi Umar Mein Intiqal Farma Gaye.

Sarkar ﷺ Ki Shahzadiyon Ke Naam Yeh Hain: Hazrat Zainab, Hazrat Ruqayyah, Hazrat Fatimah, Hazrat Umm Kulsum Raziyallahu Ta'ala Anhun. Hazrat Ibrahim Ke Siwa Baqi Sab Aulad Ummul Momineen Hazrat Khadijah Raziyallahu Ta'ala Anha Ke Batn-E-Pak Se Hain. Rahe Hazrat Ibrahim To Woh Hamare Sarkar ﷺ Ki Bandi Hazrat Mariyah Raziyallahu Ta'ala Anha Ke Batn-E-Muqaddas Se Hain.

Hazrat Zainab Raziyallahu Ta'ala Anha Ke Shohar Ka Naam Hazrat Abul Aas Raziyallahu Anhu Hai. Hazrat Zainab Ka Visal 8 Hijri Mein Hua.

Hazrat Ruqayyah Aur Hazrat Umm Kulsum Raziyallahu Ta'ala Anhuma Ke Shohar Sayyiduna Usman Ghani Raziyallahu Anhu Hain. Sarkar-E-Mustafa ﷺ Ne Hazrat Usman Ke Sath Pehle Hazrat Ruqayyah Ka Nikah Kiya Tha. Jab Woh 2 Hijri Mein Intiqal Farma Gain To Sarkar ﷺ Ne Hazrat Umm Kulsum Ka Nikah Unke Sath Kar Diya. Hazrat Umm Kulsum Ka 9 Hijri Mein Intiqal Hua. Hazrat Sayyidah Fatimah Raziyallahu Ta'ala Anha Ke Shohar Hazrat Maula Ali Raziyallahu Ta'ala Anhu Hain. Hazrat Fatimah Ka Intiqal 11 Hijri Mein Sarkar ﷺ Ke Visal Ke Chhe Mah Baad Hua.

Allah Ta'ala Ne Hazrat Fatimah Raziyallahu Ta'ala Anha Ko Chhe Aulad Ata Farmaein Jin Ke Naam Yeh Hain: Hazrat Imam Hasan, Hazrat Imam Husain, Hazrat Mohsin Raziyallahu Anhum, Hazrat Ruqayyah, Hazrat Zainab, Hazrat Umm Kulsum Raziyallahu Ta'ala Anhun. In Mein Se Hazrat Mohsin Aur Hazrat Ruqayyah Ka Bachpan Hi Mein Intiqal Ho Gaya Tha.

Aziz Nounihalo! Is Baat Ko Khoob Yaad Rakhna Ke Umm Kulsum Do Hain. Ek Hamare Sarkar-E-Pyare Mustafa ﷺ Ki Shahzadi Hain Jo Imam Hasan Ki Khala Aur Hazrat Usman Ghani Ki Biwi Hain. Aur Dusri Umm Kulsum Woh Hain Jo Hazrat Maula Ali Aur Fatimah Zahra Ki Shahzadi Aur Hazrat Imam Hasan Ki Sagi Behan Hain. Yahi Umm Kulsum Hain Jin Ka Nikah Sayyiduna Ali Raziyallahu Ta'ala Anhu Ne Hazrat Umar Farooq Raziyallahu Anhu Ke Sath Kiya Tha. In Rishton Ki Buniyad Par Sayyiduna Usman, Hazrat Maula Ali Ke Ham Zulf Yani Sadu Aur Hazrat Imam Hasan Aur Hazrat Imam Husain Ke Khalu Hain. Aur Hazrat Farooq-E-Azam Sayyiduna Maula Ali Ke Damad Aur Hazrat Imam Hasan Nez Imam Husain Ke Behnoyi Hain.

Pyare Bachcho! Sarkar-E-Mustafa ﷺ Ke Char Yaar Mein Se Do Sahabi Sarkar ﷺ Ke Khusr Aur Do Sahabi Sarkar ﷺ Ke Damad Hain. Tumhein Char Yaar Ke Naam To Yaad Honge. Agar Yaad Na Hon To Suno: Hazrat Abu Bakr Siddiq, Hazrat Umar Farooq, Hazrat Usman Ghani, Hazrat Ali Murtaza Raziyallahu Ta'ala Anhum. Hazrat Siddiq-E-Akbar Aur Hazrat Farooq-E-Azam Hamare Sarkar ﷺ Ke Khusr Hain Kyunki Siddiq-E-Akbar Ki Sahibzadi Hazrat Aisha Siddiqah Aur Farooq-E-Azam Ki Sahibzadi Hazrat Hafsah Hamare Sarkar ﷺ Ki Muqaddas Biwiyan Hain. Aur Hazrat Usman Ghani Aur Hazrat Maula Ali Hamare Sarkar ﷺ Ke Damad Hain.

Dekho! Sarkar-E-Mustafa ﷺ Aur Aap Ke Char Yaar Ke Rishte Aapas Mein Ek Dusre Ke Sath Kis Tarah Guthe Hue Hain.

Hazrat Maula Ali Raziyallahu Ta'ala Anhu Ke Kai Sahibzade Hain Jin Mein Imam Hasan Aur Imam Husain Raziyallahu Ta'ala Anhuma To Hazrat Fatimah Zahra Ke Batn-E-Pak Se Hain. Aur Aap Ke Baqi Sahibzadegan Masalan Hazrat Muhammad Bin Hanafiyyah, Hazrat Abu Bakr, Hazrat Umar, Hazrat Usman, Hazrat Abbas Alamdar Wagairah Raziyallahu Ta'ala Anhum Aap Ki Dusri Biwiyon Se Paida Hue Hain. Aap Ne Hazrat Sayyidah Fatimah Ke Intiqal Ke Baad Kai Ek Aurton Se Nikah Farmaya Tha.

Hazrat Sayyiduna Imam Hasan Aur Hazrat Sayyiduna Imam Husain Yeh Dono Agarche Sarkar-E-Mustafa ﷺ Ke Nawase Hain, Lekin Sarkar ﷺ Ne In Dono Hazrat Ko Apna Beta Qarar Diya Hai. Isi Liye In Dono Ko Shahzada-E-Rasool, Ibn-E-Rasool Aur Aal-E-Rasool Kaha Jata Hai. Duniya Mein Pyare Rasool ﷺ Ki Muqaddas Nasl Inhi Dono Shahzadon Se Chali Aur Phaili Hai.

Upar Wale Bayan Se Tum Ne Samajh Liya Hoga Ke Sayyiduna Ali Raziyallahu Ta'ala Anhu Ke Sab Bete Ibn-E-Rasool Nahin, Balki Un Mein Do Bete Yani Imam Hasan Aur Imam Husain Ibn-E-Rasool Hain. Is Liye Ke Yahi Dono Sarkar-E-Mustafa Rasulullah ﷺ Ki Beti Hazrat Fatimah Ke Bete Hain. Lihaza Inhi Dono Imam Ki Nasl Mein Paida Hone Walon Ko Ibn-E-Rasool Ya Shahzada-E-Rasool Kaha Jayega.