Walidah Ki Azmat
Walidah Ke Qadmon Ke Neeche Jannat Rakhi Gayi Hai
Walidah Ki Azmat
Duniya Mein Walidah Ek Aisa Rishta Hai Jiska Koi Nihayat Behtareen Badal Nahi Hai. Walida Se Zyada Aulaad Se Mohabbat Karne Wala Koi Aur Nahi Hota. Walida Ke Qadmon Ke Neeche Jannat Rakhi Gayi Hai. Walida Apne Bachon Ke Liye Jeeti Hai Aur Bachay Uski Sabse Badi Daulat Hote Hain, Aaiye! Walida Ki Ita‘at O Farmanbardari Aur Azmat Ke Baare Mein 5 Ahadees-E-Mubarakah Padhte Hain
Husn-E-Sulook Ka Haq Daar
Ek Shakhs Rasool-Ullah Sallallahu Alaihi Wa Aalihi Wasallam Ki Khidmat Mein Haazir Hua Aur Arz Ki: Ya Rasool-Ullah Sallallahu Alaihi Wa Aalihi Wasallam! Mere Husn-E-Sulook Ka Kaun Zyada Mustahiq Hai? Aap Alaihis-Salaam Ne Farmaya: Teri Maa. Arz Kiya Phir Kaun? Farmaya: Teri Maa. Poocha Phir Kaun? Farmaya: Teri Maa. Poocha Phir Kaun? Aap Sallallahu Alaihi Wa Aalihi Wasallam Ne Farmaya: Tera Walid.
Jannat Mein Dakhle Ki Zamanat
Huzoor-E-Akram Sallallahu Alaihi Wa Aalihi Wasallam Ne Irshaad Farmaya Ke Main Jannat Mein Daakhil Hua To Maine Suna Ke Wahan Koi Shakhs Quran-E-Majeed Ki Qiraat Kar Raha Hai. Jab Maine Poocha Ke Qiraat Karne Wala Kaun Hai? To Farishton Ne Bataya Ke Aap Ke Sahabi Haarisah Bin Nu'maan Razi Allahu Anhu Hain. Huzoor-E-Akram Sallallahu Alaihi Wa Aalihi Wasallam Ne Farmaya Ke Aey Mere Sahabiyo! Dekh Lo, Yeh Hai Nekokari, Aur Aisa Hota Hai Achhe Sulook Ka Badla. Hazrat Haarisah Bin Nu'maan Razi Allahu Anhu Sab Logon Se Zyada Behtareen Sulook Apni Maa Ke Saath Karte Thay.
Maa Ki Nafarmani Karna Haraam
Hum Apni Tez Zabaan Us Maa Ke Saamne Na Chalaayein Jis Ne Humein Harf Harf Bolna Sikhaya Hai. Nabi-E-Kareem Sallallahu Alaihi Wa Aalihi Wasallam Ka Irshaad-E-Garami Hai: Allah Ne Tum Par Maaon Ki Nafarmani Aur Bad-Sulooki Ko Haraam Kar Diya Hai.
Maa Ke Qadmon Tale Jannat
Hazrat Jahmah Razi Allahu Anhu Nabi-E-Akram Sallallahu Alaihi Wa Aalihi Wasallam Ke Paas Aaye Aur Arz Kiya: Aey Allah Ke Rasool! Main Jihaad Karne Ka Iraada Rakhta Hoon Aur Aap Ke Paas Mashwara Lene Ke Liye Haazir Hua Hoon. Aap Alaihis-Salaam Ne (Un Se) Poocha: Kya Tumhari Maa Maujood Hai? Unhon Ne Arz Kiya: Ji Haan. Aap Ne Farmaya: Usi Ki Khidmat Mein Lage Raho, Kyun Ke Jannat Un Ke Dono Qadmon Ke Neeche Hai.
Maa Ka Haq
Nabi-E-Kareem Sallallahu Alaihi Wa Aalihi Wasallam Ne Farmaya: Maa Ka Haq Ada Karte Raho. Allah Paak Ki Qasam! Agar Tum Apna Gosht Kaat Kar Use De Daalo, Tab Bhi Us Ka Chauthaayi Haq Ada Nahin Hoga.
Pyaare Bhaiyo Or Bahno!
Maa Ki Shaan O Azmat Ke Kya Kehne! Ke Ek Maa Ki Pareshani Dekh Kar Allah Paak Ne Safa Marwah Ki Sa'i Ko Hajj Ka Rukn Bana Diya. Lihaza Humein Maa Se Mohabbat Aur Un Ki Ita'at O Farmanbardari Karte Rehna Chahiye. Allah Paak Humein Apni Walida Ki Ita'at O Farmanbardari Karne Ki Taufeeq Ata Farmaaye. Aameen Bi Jahi Khaatam-Un-Nabiyyin Sallallahu Alaihi Wa Aalihi Wasallam.