Arfa Ka Din: Rasoomat Ya Deeni Haqiqat?

Arfa Ka Din

    Yeh Bhi Ek Rasm Aurton Mein Qaim Hai Ki Jis Saal Kisi Ka Intiqal Ho Uske Baad Jab Pehli Martaba Shaban Ki 14 Tareekh Aati Hai To Usko Arfa Ka Din Kehte Hain, Aur Is Din Auraten Taziyat Ke Liye Jama Hoti Hain. Agar Taziyat Na Kare To Bade Fitne Ka Khauf Hota Hai. Dekhiye Yeh Bhi Ek Jahilana Rasm Hai.

    Nabi Paak Sallallahu Alaihi Wasallam Ka Farman To Yeh Hai Ki Taziyat 3 Din Tak Hai. Ab Yeh Bataiye Ki Nabi Paak Sallallahu Alaihi Wasallam Ka Kehna Mana Jaye Ya Logon Ka? Goya Ki Nabi Paak Sallallahu Alaihi Wasallam Ne 3 Din Ke Baad Gham Ko Taza Karne Wale Amal Se Mana Farmaaya Hai, Kyunki Taziyat Se Gham Taza Hota Hai. Haan, Ulama-e-Kiram Ne Zaroor Farmaaya Ki Jo Yahan Maujood Nahi Tha, Kahi Bahar Tha, Der Se Yahan Pahuncha Jaise Kisi Dusre Mulk Se Aaya Ho Kisi Ke Intiqal Par, To Woh Teen Din Ke Baad Bhi Taziyat Kar Sakta Hai. Woh Theek Hai Lekin Jo Yahi Ke Rehne Wale Hain, Woh Agar Teen Din Ke Baad Taziyat Kare To Yeh Sakht Makrooh Hai Aur Gham Ko Ubharta Hai.

    To Ek Saal Ke Baad Taziyat Karna Bilkul Ghalat Rasm Hai Aur Isko Khatm Karna Chahiye Agar Aap Ke Bas Mein Ho. To Is Tarah Ki Rasmon Mein Bilkul Shamil Na Ho, Chahe Koi Naraz Ho Aur Ismein Narazgi Hoti Hai To Hone Dijiye, Yeh Koi Aisi Buri Baat Nahi. Aur Yeh Arfa Ka Din Banaya Hua Hai, Pata Nahi Khawateen Ismein Kya Kya Pakati Hain, Saat Qism Ke Khane Hone Chahiye, Yeh Hona Chahiye Woh Hona Chahiye Waghera Waghera, Sab Khurafat Hai. Hamara Mazhab Islam Iski Taleem Nahi Deta. Khurafat Is Lihaaz Se Kaha Ja Raha Hai Jo Fuzool Rasmein Hain. Aur Agar Aap Sirf Isale Sawab Ka Ehtimam Karein To Yeh Alag Baat Hai, Lekin Isko Lazim Aur Zaroori Samajhna, Iske Ehtimam Ko Wajib Aur Zaroori Samajhna Shuru Kar Dena, Aur Dusron Ko Bhi Yeh Karne Ki Targheeb Dilana, Aur Agar Koi Na Kare To Usko Bura Kehna Shuru Kar Dena, Yeh Sab Ghalat Cheezein Hain. In Sab Se Bachna Chahiye. (Mufti Akmal Qadri)

Murdo Ki Eid Ya Ghalat Fahmi

    14 Shaban Ko Murdo Ki Eid Kaha Jata To Kya Ye 14 Shaban Marhoomin Ki Eid Ka Din Hota Hai...? Aisa Kuch Nahi Hai Log Is Ko Kehte To Hain, Or Isko Marhoomeen Ki Eid Or Murdo Ki Eid Ka Din Mante Hain, Lekin Aisa Kuch Bhi Nahi Hai Lekin Haa Ye Zaroor Hai Ki Kuch Aisi Mubarak Ratien (Nights) Aati Hain Jinme Roohen Gharo Ki Traf Aati Hain, In Me Khass Taur Par Shabe Bar'at Ko Bhi Bayan Kiya Jata Hai

    Is Trah Juma Ka Din Or Ramzanul Mubarak Ki Ratein (Nights) Hain Jin Me Khaas Taur Par Roohein Apne Gharo Ki Traf Palat Ti Hain Or Wo Kahti Hain Hamare Liye Islae Sawab Karo Hum Par Raham Karo Hamare Ooper Sadqa Karo To Aisa Karna Bhi Chahiye Or Unko Isale Sawab Karna Chahiye Jo Bhi Hum Padh Kar Bakhsenge, Isale Sawab Karenge Us Se Insha Allah Unhen Sawab Hasil Hoga

    Baqi Murdo Ki Eid Kahna Ye Durust Nahi Hain Haa Is Me Roohein Zaroor Gharo Ki Traf Aati Hain Or Alhamdulillah Muslamano Me Ye Raij Hai Ki 14 Shaban Or 15 Shabanul Muazzam Ko Khaas Taur Par Bahut Zyada Isale Sawab Kiya Jata Hai, Or Khaas Shabe Bar'at Ko Qabristan Jana Bhi Nabi Paak Sallallahu Alaihi Wasallam Ki Sunnate Mubaraka Hai.

Shabe Bar'at Or Rasmi Muafi Nama

    Shab-E-Baraat Ka Chand Nazar Aate Hi Har Saal Ek Reel Ya Clip Viral Hone Lagti Hai – "Shab-E-Baraat Aane Wali Hai, Meri Wajah Se Koi Dukh Pahuncha Ho To Maaf Karna" – Aur Log Isse Apne Status Par Laga Kar Yeh Samajh Lete Hain Ke Unhone Maafi Maang Li, Unka Haq Ada Ho Gaya, Aur Ab Sab Kuch Theek Ho Gaya. Magar Kya Maafi Sirf Ek Status Lagane Se Mil Jati Hai? Kya Jin Logon Ke Dil Hamari Wajah Se Toot Chuke Hain, Jin Ke Huqooq Hamne Daba Rakhe Hain, Jin Ki Amanat Hamne Lautaai Nahi – Kya Unka Haq Sirf Ek Copy-Paste Ke Alfaaz Se Ada Ho Sakta Hai?
    Maafi Sirf Alfaaz Se Nahi Hoti, Balki Dil Se Ki Gayi Tauba Aur Aamaal Se Uska Saboot Dena Padta Hai. Agar Tumne Kisi Ka Haq Khaya Hai, Kisi Ke Sath Na-Insaafi Ki Hai, Kisi Ka Dil Dukhaya Hai, To Status Lagane Se Kuch Nahi Badlega – Jab Tak Tum Khud Unse Jaa Kar Maafi Nahi Maangte, Unke Dil Ka Bojh Halka Nahi Karte, Aur Apni Ghalti Ka Kaffara Nahi Ada Karte. Yeh Raat Sirf Ek Rasm Nahi, Balki Apne Rab Ke Samne Gir Kar Asal Ma'ni Mein Tauba Karne Ki Hai. Haqooq-Ul-Ibad Ka Maamla Bohat Nazuk Hai – Allah Tabaarak Wa Ta'ala Tab Tak Maaf Nahi Karega Jab Tak Mazloom Khud Tumhe Maaf Na Kar De.
    Yaqeenan Allah Ta’ala Bakhshne Wala Hai, Meharbaan Hai, Aur Uski Bargaah Mein Rujoo Karne Wale Ke Liye Uski Rehmat Ke Darwaze Hamesha Khule Hain. Magar Sirf Ek Status Laga Kar Yeh Na Socho Ke Sab Gunah Maaf Ho Gaye. Asal Maafi Tab Hogi Jab Tum Sach-Much Tauba Karoge, Gunahon Ko Chhodne Ka Pakka Iraada Karoge, Aur Jin Logon Ke Dil Dukhaye Hain Unse Jaa Kar Maafi Maangoge. Aaj Ki Raat Apne Aamaal Ka Muhasiba Karo, Apni Zindagi Ka Rukh Sudharo, Aur Sirf Alfaaz Se Nahi, Balki Apne Aamaal Se Sabit Karo Ke Tum Waqai Maafi Ke Haqdaar Ho. 💖