Arsa Daraaz Se Pak O Hind Allah Azza Wa Jallah Ke Nek Bandon Ki Tawajjo Ka Markaz Raha Hai. Mukhtalif Adwar Mein Yake Baad Deegar Beshumar Awliya-E-Kibar رَحمَةُ اللهِ عَلَيهِ اجمعین Ne Hind Ka Rukh Kiya Aur Logon Ko Na Sirf Deen-E-Islam Ki Dawat Di Balki Kufr O Shirk Ki Tareekiyon Mein Bhatkne Wale An Ginat Ghair Musalmanon Ko Allah Azza Wa Jalla Ki Wahdaniyat Aur Pyare Aaqa ﷺ Ki Risalat Se Aagah Kar Ke Unhein Daira-E-Islam Mein Dakhil Bhi Farmaya. Taj-Ul-Awliya, Sayyidul Asfiya, Waris-Un-Nabi, Ata-E-Rasool, Sultan-Ul-Hind, Hazrat Sayyiduna Khwaja Gharib Nawaz Sayyid Moinuddin Hasan Sanjari Chishti Ajmeri Rahmatullahi Alaih Ka Shumaar Bhi Inhi Buzurgon Mein Hota Hai. Aap Rahmatullahi Alaih Chhatti Sadi Hijri Mein Hind Tashreef Laaye Aur Ek Azeemus Shaan Ruhani Wa Samaji Inqilab Ka Bais Bane Hatta Ke Hind Ka Hukmaran Bhi Aap Ki Shakhsiat Se Maroob Ho Kar Taaib Hua Aur Aqidat Mandon Mein Shaamil Ho Gaya. Aaiye! Khwaja Gharib Nawaz Rahmatullahi Alaih Ki Zindagi Ke Haseen Pehluon Ko Mulahiza Kijiye.
Wiladat-E-Basadat
Hazrat Sayyiduna Khwaja Gharib Nawaz Sayyid Moinuddin Hasan Sanjari Chishti Ajmeri Alaihir Rahma 537 Hijri Mutabiq 1142 CE Mein Sijistan Ya Seistan Ke Ilaqe "Sanjar" Mein Paida Hue.
Naam Aur Silsila Nasab
Aap Rahmatullahi Alaih Ka Ism-E-Grami Hasan Hai Aur Aap Najeeb-Ut-Tarfain Hasani Wa Hussaini Sayyid Hain. Aap Ke Alqaab Bohot Zyada Hain, Magar Mashhoor Wa Ma'roof Alqaab Mein Moinuddin, Khwaja Gharib Nawaz, Sultan-Ul-Hind, Waris-Un-Nabi Aur Ata-E-Rasool Waghera Shaamil Hain. Aap Ka Silsila-E-Nasab Sayyid Moinuddin Hasan Bin Sayyid Ghyasuddin Hasan Bin Sayyid Najmuddin Tahir Bin Sayyid Abdul Aziz Hai.
Waliden-E-Karimeen
Aap Rahmatullahi Alaih Ke Walid-E-Majid, Sayyid Ghiyasuddin Rahmatullahi Alaih, Jin Ka Shumaar Sanjar Ke Ameer Aur Raees Logon Mein Hota Tha, Intehai Muttaqi, Parhezgar Aur Sahib-E-Karamat Buzurg The. Neez Aap Rahmatullahi Alaih Ki Walida-E-Majida Bhi Aksar Awqat Ibadat Wa Riyaazat Mein Mashghool Rehne Wali Naik Seerat Khatoon Thi. Jab Hazrat Sayyiduna Khwaja Gharib Nawaz Rahmatullahi Alaih 15 Saal Ki Umar Ko Pahunche, To Walid-E-Mukarram Ka Visal-E-Purmalal Ho Gaya. Wirasat Mein Ek Bagh Aur Ek Pan Chakki Mili. Aap Rahmatullahi Alaih Ne Isi Ko Zariya-E-Ma'ash Banaliya Aur Khud Hi Bagh Ki Nigahbani Karte Aur Darakhton Ki Aabiyari Farmaate.
Husool-E-Ilm Ke Liye Safar
Hazrat Sayyiduna Khwaja Moinuddin Chishti Rahmatullahi Alaih Ne 15 Baras Ki Umar Mein Husool-E-Ilm Ke Liye Safar Ikhtiyar Kiya Aur Samarqand Mein Hazrat Sayyiduna Maulana Sharfuddin Rahmatullahi Alaih Ki Bargah Mein Hazir Ho Kar Baaqaidah Ilm-E-Deen Ka Aaghaz Kiya. Pehle Quran-E-Pak Hifz Kiya Aur Uske Baad Inhi Se Deegar Uloom Hasil Kiye. Magar Jaise Jaise Ilm-E-Deen Seekhte Gaye, Zoq-E-Ilm Badhta Gaya.
Chunanchah, Ilm Ki Pyaas Ko Bujhane Ke Liye Bukhara Ka Rukh Kiya Aur Shuhrah-Aafaq Aalim-E-Deen Maulana Hissamuddin Bukhari Rahmatullahi Alaih Ke Samne Zanu-E-Talalmuz Teh Kiya. Phir Inhi Ki Shafqaton Ke Saaye Mein Aap Rahmatullahi Alaih Ne Thode Hi Arse Mein Tamam Deeni Uloom Ki Takmeel Kar Li. Is Tarah Aap Rahmatullahi Alaih Ne Majmu’i Tor Par Taqreeban Paanch Saal Samarqand Aur Bukhara Mein Husool-E-Ilm Ke Liye Qiyam Farmaya. Is Arse Mein Uloom-E-Zahiri Ki Takmeel To Ho Chuki Thi, Magar Jis Tadap Ki Wajah Se Ghar Baar Ko Khairbad Kaha Tha, Uski Taskeen Abhi Baaqi Thi. Chunanchah Kisi Aise Tabib-E-Haaziq Ki Talaash Mein Nikal Khade Hue Jo Dard-E-Dil Ki Dawa Kar Sake.
Chunanchah, Murshid-E-Kaamil Ki Justujo Mein Bukhara Se Hijaz Ka Rukh Kiya. Raste Mein Jab Nishapur (Suba Khurasan, Iran) Ke Nawahi Ilaqe "Haroon" Se Guzar Hua Aur Mard-E-Qalander Qutub-E-Waqt Hazrat Sayyiduna Khwaja Usman Harooni Chishti Rahmatullahi Alaih Ka Shuhrah Suna, To Fauran Hazir-E-Khidmat Hue. Aap Ne Unke Dast-E-Haqq Parast Par Bait Kar Ke Silsila-E-Chishtiya Mein Dakhil Ho Gaye۔
Bargah-E-Ilahi Mein Maqbooliyat
Ek Martaba Haj Ke Mauqa Par Hazrat Sayyiduna Khwaja Usman Harooni Rahmatullahi Alaih Ne Mizab-E-Rahmat Ke Neeche Aap Rahmatullahi Alaih Ka Haath Pakad Kar Bargah-E-Ilahi Mein Dua Ki: "Ae Maula! Mere Moinuddin Hasan Ko Apni Bargah Mein Maqbool Farma." Ghaib Se Awaaz Aayi: "Moinuddin Hamara Dost Hai, Humne Isey Maqbool Kiya۔"
Bargah-E-Risalat Se Hindustan Ki Sultani
Bargah-E-Risalat ﷺ Mein Hazrat Khwaja Moinuddin Chishti Rahmatullahi Alaih Ke Martabe Ka Andaza Is Baat Se Lagaya Ja Sakta Hai Ke Ek Martaba Aap Ko Madinah Sharif Ki Hazri Ka Sharaf Mila. Aap Ne Nihayat Adab O Ehtram Ke Sath Yeh Salam Arz Kiya: "As-Salatu Was-Salamu Alaika Ya Sayyid Al-Mursaleen Wa Khatamun-Nabiyyin." Is Par Rauza-E-Aqdas ﷺ Se Awaaz Aayi: "Wa Alaikumus Salam Ya Qutub Ul-Mashaikh." Neez, Hazrat Sayyiduna Khwaja Gharib Nawaz Ko Hind Ki Sultani Bhi Bargah-E-Risalat ﷺ Se Hi Ata Hui. Chunanchah, Silsila-E-Aaliya Chishtiya Ke Azeem Peshwa, Khwaja Khawajgan, Sultan-Ul-Hind Hazrat Khwaja Gharib Nawaz Hasan Sanjari Rahmatullahi Alaih Ko Madinah Munawwarah Ki Hazri Ke Mauqa Par Sayyid-Ul-Mursaleen, Khatam-Un-Nabiyyin ﷺ Ki Taraf Se Yeh Basharat Mili: "Ae Moinuddin, Tu Hamare Deen Ka Moin (Madadgar) Hai. Tujhe Hindustan Ki Wilayat Ata Ki. Ajmer Ja, Tere Wujood Se Be-Deeni Door Hogi Aur Islam Roshan Hoga۔"
Sultan-Ul-Hind Ka Safar-E-Hind
Aap Rahmatullahi Alaih, Bargah-E-Risalat ﷺ Se Mili Basharat Ke Baad Hind Ki Taraf Rawana Hue. Apne Safar Ke Dauraan Samarqand, Bukhara, Uroos-Ul-Bilad Baghdad Sharif, Nishapur, Tabriz, Osh, Asfahan, Sabzwar, Khurasan, Khirqan, Ishtarabad, Balkh Aur Ghazni Waghera Se Hote Hue Hind Ke Shehar Ajmer Sharif (Suba Rajasthan) Pahunche. Is Poore Safar Mein Aap Rahmatullahi Alaih Ne Sekron Awliya Allah Aur Akabireen-E-Ummat Se Mulaqat Ki. Chunanchah, Har Jagah Aap Rahmatullahi Alaih Ne Apni Roohani Taqwe Aur Ilm Ke Zariye Logon Ke Dil Jeete Aur Unhein Deen-E-Islam Ki Taraf Bulaya. Ajmer Sharif Mein Aap Ne Apna Qiyaam Farmaya Aur Yahan Se Islam Ki Roshni Puray Hindustan Mein Phaili۔
Hum Asar Ulama Aur Awliya Se Mulaqat
Hazrat Khwaja Moinuddin Chishti Rahmatullahi Alaih Baghdad Mu'alla Mein Hazrat Sayyiduna Ghaus-E-Azam Mohiyuddin Sayyid Abdul Qadir Jilani Rahmatullahi Alaih Ki Khidmat Mein Hazir Hue Aur Paanch Maah Tak Bargah-E-Ghausia Se Iktisab-E-Faiz Kiya. Tabriz Mein Sheikh Badruddin Abu Saeed Tabrezi Rahmatullahi Alaih Ki Bargah Se Ilm Ki Miraas Hasil Ki۔ Asfhan Mein Sheikh Mahmood Asfahani Rahmatullahi Alaih Ke Paas Hazir Hue Aur Wahan Se Ilm O Marfat Ke Noor Se Mustafiz Huye۔ Kharaqan Mein Sheikh Abu Saeed Abul Khair Aur Khwaja Abul Hasan Kharaqani عَلَيْهِم الرحمہ Ke Mazarat Par Hazri Di۔ Ishtirabad Mein Hazrat Allama Sheikh Nasiruddin Ishtarabadi Rahmatullahi Alaih Se Kasb-E-Faiz Kiya۔
Heraat Mein Sheikh-Ul-Islam Imam Abdullah Ansari عَلَيْهِ الرحمہ Ke Mazar Ki Ziarat Ki Aur Balkh Mein Sheikh Ahmad Khidruya Rahmatullahi Alaih Ki Khanqah Mein Qiyaam Farma Kar Apne Ruhani Silsile Ko Mazid Mazboot Banaya۔
Data Ki Bargah Mein Khwaja Ki Hazri
Apne Safar Ke Dauraan, Hazrat Khwaja Moinuddin Chishti Rahmatullahi Alaih Ne Hazrat Data Ganj Bakhsh Sayyid Ali Hijweri Rahmatullahi Alaih Ke Mazar-E-Aqdas Par Hazri Di. Aap Rahmatullahi Alaih Ne Na Sirf Hazri Di, Balke Mazar Par Muraqba Bhi Kiya Aur Hazrat Sayyiduna Data Ganj Bakhsh Rahmatullahi Alaih Ka Khaas Roohani Faiz Hasil Kiya۔ Mazar-e-pur-anwar Se Rukhsat Hote Waqt, Aap Ne Hazrat Data Ganj Bakhsh Rahmatullahi Alaih Ki Azmat Aur Unke Faizan Ka Izhar Is Mashhoor Aur Ma'roof She’r Ke Zariye Kiya:
گنج بخش فیض عالم مظہر نور خدا ☆ ناقصاں را پیر کامل کاملاں را رہنما
Yani: "Ganj Bakhsh Data Ali Hijweri Rahmatullahi Alaih Ka Faiz Tamam Duniya Par Jari Hai Aur Aap Noor-e-Khuda Ke Mazhar Hain. Aap Ka Maqam Yeh Hai Ke Jo Raah-e-Tariqat Mein Naqis Hain, Unke Liye Aap Pir-e-Kamil Hain Aur Jo Khud Pir-e-Kamil Hain, Unke Liye Bhi Rahnuma Hain."
Farman-e-Ghaus-e-Azam Par Sar Jhuka Diya
Jab Hazrat Sayyiduna Ghaus-e-Azam Rahmatullahi Alaih Ne Baghdad Muqaddas Mein Irshad Farmaya: "قدمي هذه على رقبة كُلِّ وَلِي الله Yani: "Mera Yeh Qadam Allah عزوجل Ke Har Wali Ki Gardan Par Hai." To Us Waqt Hazrat Khwaja Gharib Nawaz Sayyiduna Moinuddin Chishti Ajmeri Rahmatullahi Alaih Apni Jawani Ke Dino Mein Mulk-e-Khurasan Mein Waqay Ek Pahadi Ke Daaman Mein Ibadat Kiya Karte The. Jab Aap Ne Yeh Farman-e-Aali Suna, To Apna Sir Jhuka Liya Aur Farmaya: "بَلْ قَدَمَاک على رأسي وعيني" Yani: "Balkay Aap Ke Qadam Mere Sir Aur Aankhon Par Hain."
Sajada Nasheen Aur Khulafa
Huzoor Sayyidi Khwaja Gharib Nawaz Rahmatullahi Alaih Ke Khulafa Mein Sab Se Qareebi Aur Mahboob Hazrat Sayyiduna Qutbuddin Bakhtiyar Kaki Rahmatullahi Alaih The. Khwaja Sahib Rahmatullahi Alaih Ke Wisal-e-Zahiri Ke Baad, Aap Hi Sajjada Nasheen Hue. Unke Ilaawa, Dusre Jaleel-ul-Qadr Khulafa Mein Hazrat Qazi Hamiduddin Nagori, Sultan-ul-Tarikeen Hazrat Sheikh Hamiduddin Sufi Aur Hazrat Sheikh Abdullah Bayabani (Saabiqa Ajay Pal Jogi) رَحِمَهُمُ اللهِ تَعَالٰی عَلَيْهِمْ أَجْمَعِیْن Ka Shumaar Hota Hai.
Wisal Pur Malal
Hazrat Khwaja Gharib Nawaz Rahmatullahi Alaih Ke Wisal Ki Raat, Kuch Buzurgon Ne Khawab Mein Allah عزوجل Ke Mahboob Aur Danaye-Ghayub, Hazrat Muhammad ﷺ Ko Yeh Farmate Hue Suna: "Mere Deen Ka Mu'een Hassan Sanjri Aa Raha Hai, Main Apne Mu'een-ul-Deen Ke Istiqbal Ke Liye Aaya Hoon." Chunanchah, 6 Rajab Al-Murajab 633 AH (16 March 1236 CE) Ko, Monday Ke Din, Fajr Ke Waqt, Muhibbin Intezaar Mein The Ke Peer-o-Murshid Aakar Namaz-e-Fajr Padhayeinge, Lekin Afsos! Unka Intezaar Karna Be-Sood Raha. Kaafi Der Guzar Jane Ke Baad, Jab Hazrat Khwaja Gharib Nawaz Rahmatullahi Alaih Ke Hujra-e-Sharif Ka Darwaza Khola Gaya, To Gham Ka Samundar Umand Aaya. Hazrat Sayyiduna Khwaja Khwajagan Sultan-ul-Hind Moinuddin Hassan Chishti Ajmeri Rahmatullahi Alaih Wisal Farma Chuke The. Dekhne Walo Ne Yeh Hairat Angaiz Aur Roohani Manzar Apni Aankhon Se Dekha, Ke Hazrat Khwaja Gharib Nawaz Rahmatullahi Alaih Ki Noorani Peshaani Par Yeh Ibarat Naqsh Thi: حَبِیْبُ اللهِ مَاتَ فِی حُبِّ اللّٰہ Yani: "Allah Ka Mahboob Banda Allah Ki Muhabbat Mein Wisal Farma Gaya."
Mazar Mubarak Aur Urs
Sultan-ul-Hind Khwaja Moinuddin Hassan Chishti Ajmeri Rahmatullahi Alaih Ka Mazaaar-e-Aqdas Hind Ke Mashhoor Shahar Ajmer Sharif (Suba Rajasthan, Shumali Hind) Mein Hai. Yahan Har Saal Aap Ka Urs Mubarak 6 Rajab Ul-Murajjab Ko Nihayat Tuzk-o-Ihtisham Ke Saath Manaya Jata Hai Aur Is Tareekh Ki Nisbat Se Urs Mubarak Ko "Chhati Sharif" Bhi Kaha Jata Hai. Is Urs Mein Mulk Aur Bairoon-e-Mulk Se Hazaaron Afraad Bade Josh-o-Jazbe Se Shirkat Karte Hain Aur Khwaja Gharib Nawaz Rahmatullahi Alaih Se Apni Aqeedat Ka Izhaar Karte Hain
Stay Connected For Authentic Islamic Knowledge & Inspiration!
JazakAllah Khair For Engaging With Our Content! If You Found It Valuable, We Invite You To Join Our Growing Community For More Insightful Teachings, Daily Updates, And Motivational Posts.
👉 Follow Us On Instagram – Links To All Our Social Media Platforms Are In Our Bio!
Whether It's WhatsApp Channel, Facebook, YouTube, Twitter, Or Telegram, Find It All In One Place.