Aurat Islam Se Pahle

    Islam Se Pehle Auraton Ka Haal Bahut Kharab Tha. Duniya Mein Auraton Ki Koi Izzat Aur Waq'at Nahi Thi. Mardon Ki Nazar Mein Auraton Ki Haisiyat Is Se Zyada Kuch Nahi Thi Ke Woh Mardon Ki Nafsani Khwahishat Puri Karne Ka Ek "Khilona" Thi. Auratein Din Raat Mardon Ki Qism Qism Ki Khidmat Karti Thi Aur Tarah Tarah Ke Kaamon Mein Mashghool Rehti Thi. Yahan Tak Ke Doosron Ki Mehnat Mazdoori Karke Jo Kuch Kamati Thi, Woh Bhi Mardoon Ko De Deti Thi. Magar Zalim Mard Phir Bhi Un Auraton Ki Koi Qadr Nahi Karte The, Balkay Jaanwaron Ki Tarah Unko Maarte Peet-te The.

    Zara Zara Si Baat Par Auraton Ke Kaan, Naak Wagairah Badan Ke A'aza Kaat Liya Karte The Aur Kabhi Qatal Bhi Kar Daalte The. Arab Ke Log Ladkiyon Ko Zinda Dafn Kar Diya Karte The, Aur Baap Ke Marne Ke Baad Uska Ladka Jis Tarah Baap Ki Jaaydaad Aur Samaan Ka Maalik Ho Jaata Tha, Usi Tarah Apne Baap Ki Biwiyon Ka Maalik Ban Jaata Tha. Auraton Ko Unke Maa Baap, Bhai Behen Ya Shauhar Ki Miras Mein Se Koi Hissa Nahi Milta Tha, Na Auratein Kisi Cheez Ki Maalik Hoti Thi.

    Arab Ke Kuch Qabeelon Mein Yeh Zalimana Dastoor Tha Ke Bewa Ho Jaane Ke Baad Auraton Ko Ghar Se Bahar Nikaal Kar Ek Chhote Se Tang Aur Tareek Jhopde Mein Ek Saal Tak Qaid Mein Rakha Jaata Tha. Woh Jhopde Se Bahar Nahi Nikal Sakti Thi, Na Ghusal Kar Sakti Thi, Na Kapde Badal Sakti Thi. Khana Paani Aur Apni Saari Zarooratein Usi Jhopde Mein Poori Karti Thi. Bohat Si Auratein To Ghut Ghut Kar Mar Jaati Thi, Aur Jo Zinda Bach Jaati Thi To Ek Saal Ke Baad Unke Aanchal Mein Oont Ki Mengniyan (camel's Manure) Daal Di Jaati Thi, Aur Unko Majboor Kiya Jaata Tha Ke Woh Kisi Jaanwar Ke Badan Se Apne Badan Ko Ragarain.

    Phir Saare Sheher Mein Usi Ganday Libaas Mein Chakkar Lagaye Jaate The Aur Idhar Udhar Onth Ki Mengniyan Phenkti Hui Chalti Rehti Thi. Yeh Is Baat Ka Elaan Hota Tha Ke Un Auraton Ki Iddat Khatam Ho Gayi Hai. Isi Tarah Ki Doosri Bhi Bahut Si Kharab Aur Takleef Deh Rasmain Thi Jo Ghareeb Auraton Ke Liye Museebaton Aur Balaon Ka Pahaad Ban Gayi Thi, Aur Bechari Museebat Ki Maari Auratein Ghut Ghut Kar Aur Ro Ro Kar Apni Zindagi Ke Din Guzarti Thi.

    Hindustan Mein Bhi Bewa Auraton Ke Saath Aise Aise Dardnaak Zalimana Sulook Kiye Jaate The Ke Jinhein Soch Soch Kar Kaleja Munh Ko Aa Jaata Hai. Gharaz, Poori Duniya Mein Be-Rahm Aur Zalim Mard Auraton Par Aise Aise Zulm O Sitam Ke Pahaad Toadte The Ke Un Zulmon Ki Daastaan Sun Kar Ek Dardmand Insaan Ke Seene Mein Ranj O Gham Se Dil Tukde Tukde Ho Jaata Hai. In Mazloom Aur Bekas Auraton Ki Majboori Aur Laa-Chari Ka Yeh Aalam Tha Ke Samaaj Mein Na Auraton Ke Koi Huqooq The, Na Unki Mazloomiyat Par Daado-faryaad Ke Liye Kisi Qanoon Ka Koi Sahara Tha.

    Hazaaron Baras Tak Yeh Zulm O Sitam Ki Maari Dukhyaari Auratein Apni Is Bekasi Aur Laa-Chari Par Roti Bilakti Aur Aansu Bahaati Rehti Thi, Magar Duniya Mein Koi Bhi Un Auraton Ke Zakhmon Par Marham Rakhne Wala Aur Unki Mazloomiyat Ke Aansuon Ko Ponchhne Wala Door Door Tak Nazar Nahi Aata Tha. Na Duniya Mein Koi Bhi Unke Dukh Dard Ki Faryaad Sunne Wala Tha, Na Kisi Ke Dil Mein Un Auraton Ke Liye Baal Barabar Bhi Rahm O Karam Ka Koi Jazba Tha.

    Auraton Ke Is Haal Zaar Par Insaaniyat Ranj O Gham Se Bechain Aur Be-Qarar Thi, Magar Iske Liye Uske Siwa Koi Chaara Kaar Nahi Tha Ke Woh Rahmate Khudawandi Ka Intezaar Kare Ke Arham-ur-raahimeen Ghaib Se Koi Aisa Samaan Paida Farma De Ke Achanak Saari Duniya Mein Ek Anokha Inqilab Numoodar Ho Jaye Aur Laachaar Auraton Ka Saara Dukh Dard Door Ho Kar Unka Beda Paar Ho Jaye. Chunanche Rahmat Ka Aftaab Jab Tulu Ho Gaya To Saari Duniya Ne Achanak Yeh Mehsoos Kiya Ke:

Jahan Taareek Tha, Zulmat Kada Tha, Sakht Kaala Tha

Koi Parde Se Kya Nikla Ke Ghar Ghar Mein Ujala Tha.